Ka hiri, ka hiritia rā
Ko Te Arikinui Kuini Nga wai hono i te po, te mana motuhake o ngā iwi o te motu
Paimaarire!
Ko Taupiri, Tiheia, me Maungahaumi ngā maunga whakahī.
Ko Waikato, Te Waimimi a Pekehaua, Waipoua ngā ara whakatere taniwha.
Ko Tainui, Te Arawa, Takitimu ngā waka.
Ko Waikato, Ngāti Rangiwewehi, Te Aitanga ā Mahaki ngā iwi.
Ko Puahaere Vaka ahau.
Ko te tuāpapa o tōku ao haka ko ōku mātua, nā rāua anō te kākano o haka i whakatō ki te ngakau, ki te whatumanawa. Tupu mai au ki te puāhurutanga o Hinerehia, o Tanerore mō ngā tau 30 tekau kua pāhemo ake nei. Nā kona pupū ake te hiahia ki roto i ahau ki tēnei ahurea o tātou, me ōna aupiki, auheke katoa, nā whai anō, ka puta te ihu hei kaihaka, hei kaitātaki, hei kaiako haka hoki. I au e kawe ana i ēnei haipapa maha o ia tūranga ka rongo, ka mōhio, ka mārama ki te whānui o ēnei tūranga o roto mai o te ao haka, mai muri ki mua, mai runga ki raro ahakoa te whakataetae, ahakoa te reanga, ahakoa te tau.